رواية شريك حياتي الفصل الثامن 8 بقلم عمرو راشد
فارس انا بحبك
" وبدون أي مقدمات لقيتها دخلت في حضني،، طبطبت عليها وقولتلها
وانا كمان بحبك اكتر
" خرجت من حضني وقالتلي وهي عيونها بتدمع
انا اسفة،، والله اسفة على كل اللي بيحصل دا
" حطيت ايدي على بوقها
ششش احنا لو وسط مليون مشكلة كفاية اني اكون شايفك قدام عيني ومطمن عليكي،، دا انا اللي بشكر الظروف والمشاكل دي والله انها جمعتني بيكي،، متقلقيش انا جنبك،، كل دا هيخلص قريب ان شاء الله
" قربت منها و بو*ستها من جبينها
مش عايزة أي حاجة من تحت؟
= متتأخرش عشان بخاف اقعد لوحدي
أنا مقدرش اتأخر اصلا
" بعدها فارس نزل وانا غيرت هدومي ونمت على السرير،، كنت حاسة اني مرهقة أوي،، دا غير مكان الجر*ح اللي واجعني،، في لحظة عنيا قفلت ونمت،، معرفش نمت قد ايه لكني قلقت بعدها على صوت خطوات في الشقة،، فتحت عيني لقيت فارس قاعد على كرسي جنبي ونايم،، فجأه الباب اتفتح و شوفت البوليس دخل ومسك فارس، ساعتها صرخت
فارس،، فارس متسبنيش، متسبنييش لا
فااارس!!
" فتحت عيني وانا مفزوعة وهنا جسمي بدأ يهدى شوية لما استوعبت اني لسة في شقة عمر،، حمدت ربنا و قومت من على السرير،، الجر*ح ساعتها كان واجعني جدا ولكني قومت،، خرجت برا للصالة لقيت فارس نايم على الكنبة،، قعدت جنبه وطبطبت عليه بهدوء وبدأت المس وشه ولكنه صحي بسرعة
رقية أنتي كويسة؟
= كويسة يا حبيبي اهدى
طب اومال قاعدة كدا ليه؟
= اصل حلمت حلم وحش أوي ف كنت خايفة اكمل نوم
" بص ليا و غمزلي وقال
ايه رأيك انام جنبك؟
= لا طبعا
هحكيلك حدوتة
= افكر
هحكيلك كل يوم حدوتة مختلفة وحتى لو منمتيش هحكي واحدة تانية
= عرض مغري الصراحة
بسرعة بقا قبل ما اسحب العرض عشان دا لمدة معينة
= هفكر و اقولك
طب متفكريش كتير ونبي
" رديت وأنا بضحك
حاضر
" الساعة كانت 5 الفجر،، فارس أول ما سمع الأذان نزل يصلي وانا كمان اتوضيت وصليت في البيت،، بس هو اتأخر شوية تقريبا نص ساعة بعد معاد الصلاه لحد ما لقيته داخل من باب الشقة
جيبتلك بقا فطار هتحلفي بيه طول عمرك
= جيبتلي ايه؟
فول وطعمية وبطاطس وبتنجان و جبن،، حاجات كتير مش لسة هعد
= بس انا تعبانة مش هعرف احضر كل دا
يا سيدي على الدلع
= طب ماهو انا تعبانة فعلا يا فارس
يا حبيبة قلب فارس أنا عارف ومين قالك أصلا اني كنت هسيبك تعملي حاجة بنفسك،، أنتي تقعدي وترتاحي وكل حاجة هتيجي لحد عندك
" بالفعل هو اللي دخل المطبخ وبدأ يحضر الاكل وبعد 10 دقايق لقيته خارج،، بصراحة الاكل كان شكله جميل أوي،، و محطوط على الصنية بشكل منظم ويفتح النفس،، قعدنا جنب بعض وفارس تقريبا مكنش بياكل لانه كان طول ما هو قاعد بيأكلني بإيده،، خلصنا اكل وهو برضو اللي قام وعمل الشاي اللي انا اساسا مبحبوش
يعني ايه مبتحبيش الشاي؟
= مبحبوش والله يا فارس
اومال بتحبي ايه يا حبيبتي؟
= يعني ممكن اشرب نسكافيه مثلا أو كابتشينو
دا في جنينة بيتكو وانتي ماشية بتقطفي الورد،، هنا مفيش غير شاي وشاي بالنعناع
= طب مفيش شاي بلبن حتى
نسيت اجيب لبن والله،، هبقا اجيب وأنا راجع
= هو انت نازل؟
اه هنزل اروح ل امي،، زمانها قلقانة عليا اكتر بعد ما البوليس راح البيت
= طب ما تكلمها
امي مش هتطمن بمكالمة تليفون انا عارفها
= طب هاجي معاك؟
تيجي معايا فين يا رقية؟،، مينفعش طبعا انتي تعبانة
= هيبقا خطر عليك يا فارس
متقلقيش انا مش هتأخر،، وعمر هيبقا معايا
= خلي بالك من نفسك عشان خاطري،، عشان خاطري يا فارس بالله عليك
متقلقيش يا حبيبتي،، المهم اوعي أنتي تفتحي تليفونك
= حاضر
" فارس شرب الشاي وقعدنا مع بعض شوية وبعدها نزل،، وأنا فضلت قاعدة لوحدي،، كنت رايحة وجاية في الشقة من كتر الزهق،، لقيت تليفوني قدامي،، وبمجرد ما فتحت لقيت نورا بتتصل
" نزلت انا روحت عند امي بس ركبت عربية عمر،، كنت لابس كاب ونضارة شمس عشان محدش يعرفني،، وصلنا قدام البيت،، نزلت من العربية وطلعت البيت وفتحت الباب و دخلت لقيت امي نايمة على الكنبة في الصالة،، قربت منها بهدوء وبدأت اصحيها
ماما،، يا ماما
" فتحت عينها واول ما شافتني قامت بسرعة و حضنتني
فارس حبيبي وحشتني أوي
= وانتي كمان وحشتيني يا امي،، طمنيني عليكي
هتطمن عليا ازاي وانا في الحالة دي؟
= مالك يا امي؟
القلق والخوف مش بيفارقو قلبي يابني،، مش عارفة انام
= معلش يا امي هي مشكلة بسيطة وهتعدي ان شاء الله
على فكرة البوليس جه هنا وسأل عليك
= وقولتيله ايه؟
قولتله انك مبتجيش بقالك كتير واني معرفش انت فين
= وهو دا الرد اللي عايزك تقوليه دايما لاي حد يسألك
لحد امتا يا فارس،، هتفضل هربان لحد امتا؟
= لحد ما اعرف اثبت الحقيقة
وهي ايه الحقيقة؟
= الحقيقة أن وليد دا وراه مصايب وأنا مش ههدى غير لما اعرفها
الحقيقة ان الناس دي اكبر منك يا فارس وانا مش قدهم،، عشان خاطري بلاش
= مبقاش ينفع يا امي خلاص،، المهم دلوقتي عايزك تطمني وفي خلال أيام ان شاء الله كل دا هيخلص
" طبعا امي عندها حق مليون في المية بس انا هعمل ايه،، مقدرش اسيب رقية لوحدها،، فضلت قاعد معاها عشان أحاول اطمنها بأي شكل وبعدها نزلت ركبت العربية مع عمر عشان ارجع تاني للبيت عنده
على فكرة يا فارس امك ممكن تروح تشهد ان وليد هو اللي ضر*ب نار على رقية وبكدا كل التهم اللي عليك هتسقط و هتروح ل وليد
= انا مقدرش احط امي في موقف زي دا يا عمر،، افرض بقا هما بعتو حد عمل فيها حاجة لقدر الله،، هعمل ايه ساعتها؟
انت ليه متشائم كدا،، انت عندك حل تاني؟
= حتى لو معنديش،، خلي امي بعيد عن الموضوع دا يا عمر
" وصلت البيت كانت الساعة 4 العصر،، طلعت الشقة ودخلت
رقية،، رقية انتي فين
" فجأه لقيتها خارجة من جوا وهي مبتسمة وبتقول
نعم يا حبيبي
= بتعملي ايه
كنت بعملك الغدا ولا انت مش جعان؟
= انتي ايه الميكب اللي في وشك دا؟،، جبتيه منين؟
تصدق لقيته هنا عند عمر
= مش سهل عمر دا والله،، طب يا حبيبي ليه تعبتي نفسك وقومتي،، مانا قايلك تقعدي عشان الجر*ح بتاعك
انا مش تعبانة خالص على فكرة،، و يلا بقا لو سمحت متعطلنيش و روح اقعد لحد ما اخلص الاكل
" ساعتها دخلت المطبخ وجهزت الاكل كله،، تقريبا مخرجتش غير بعد ساعتين،، لما خرجت لقيته نايم وحاولت اصحيه كتير بس مكنش راضي يقوم،، قعدت جنبه وسندت دماغي ل ورا
فلاش باك
رقية انتي فين؟
= على فكرة انا زعلانة منك،، بتبلغي عن اختك يا نورا؟
يا حبيبتي والله دا مش انا،، وليد سمعني وأنا بتكلم معاكي و لما سألني عنك ومقولتش ضر*بني،، سامحيني يا حبيبتي
= انتي مش كنتي قولتي انك طردتيه
رجع تاني يا رقية ما انتي عارفة وليد،، مكنتش قادرة عليه المهم يا حبيبتي طمنيني عليكي
= انا كويسة يا نورا متقلقيش
مش ناوية ترجعي بيتك بقا؟،، البيت وحش أوي من غيرك
= هرجع لما اثبت الحقيقة على جوزك
يا حبيبتي فارس دا هو سبب المشاكل كلها،، لولا ظهوره في حياتنا كان زماننا قاعدين مبسوطين ومكنش حصلت المشاكل دي
= انا مكتشفتش اني عايشة يا نورا غير لما فارس ظهر،، قبلها كنت مدفو*نة بالحيا
طب قوليلي أنتي فين؟
= عشان تبلغي عني تاني
والله المرادي هاخد بالي كويس،، متقلقيش بقا بس انا همو*ت و اطمن عليكي،، و رحمه بابا وماما قوليلي مكانك فين
= طب هبعتلك لوكيشن
" ساعتها خدت وليد والرجالة و روحنا على العنوان،، وصلنا و طلعنا فوق،، خبطت على الباب وبعد شوية رقية فتحت
وحشتيني أوي يا نورا
= وانتي كمان يا قلب نورا
تعالي ادخلي
= لا يا حبيبتي انا مش هدخل،، أنتي اللي هتيجي معايا
هاجي معاكي فين؟
" ساعتها وليد والرجالة دخلو الشقة،، رقية بدأت تصرخ
يا نورا خليهم يسيبوني،، يا نورااا
" وليد ضر*ب رقية على دماغها لحد ما فقدت الوعي،، خدتها و دخلت جوا معاها في الأوضة وبدلت الهدوم بتاعتنا،، انا لبست هدومها وهي لبست هدومي،، بعدها خرجت وشاورت للرجالة يدخلو ياخدوها،، وفعلا شالوها ونزلو بيها على تحت اما انا كان عندي مهمة تانية لاني اكتشفت اني مش هينفع اخفي رقية غير لما فارس يختفي هو كمان بس السجن مكنش كفاية،، دا كان لازم يختفي تماما وعشان كدا قعدت واستنيته لحد ما رجع وعملتله الاكل اللي هحطله فيه السم عشان يمو*ت و ارتاح منه للابد!!
#يتبع
